കടകളില്‍ ബില്ലടിക്കാന്‍ ഫോണ്‍നമ്ബര്‍ കൊടുക്കാറുണ്ടോ? അപകടമാണ്, സ്വൈര്യക്കേടാണ്; സൂക്ഷിക്കുക
.jpeg)
തിരുവനന്തപുരം: പണം കൊടുത്താല്‍ സാധനം കിട്ടുന്ന കാലമുണ്ടായിരുന്നു പണ്ട്. എന്നാല്‍ ഇപ്പോള്‍ പണം കൊടുക്കുന്നതിന് മുന്‍പ് മൊബൈല്‍ നമ്ബര്‍ കൊടുക്കേണ്ട സ്ഥിതിയാണ്.
സൂപ്പര്‍മാര്‍ക്കറ്റുകളാകട്ടെ, ചെറുതും വലുതുമായ കടകളുമാകട്ടെ, മൊബൈല്‍ നമ്ബര്‍ ഇപ്പോള്‍ ഒഴിച്ചുകൂടാനാകാത്ത ഒന്നാണ്. എന്നാല്‍ ഈ നമ്ബര്‍ കൈമാറുന്നത് സുരക്ഷിതമാണോ? ഇത്തരത്തില്‍ മൊബൈല്‍ നമ്ബര്‍ കൈമാറുന്നത് അപകടകരവും സ്വൈര്യക്കേടുമാണെന്ന് മനോജ് രവീന്ദ്രന്‍ നിരക്ഷരന്‍ പറയുന്നു.
ജീവിതത്തില്‍ മറ്റൊരു പ്രശ്നവും ഇല്ലാത്തവരായതുകൊണ്ടാണോ പുറത്തു നിന്ന് ഇത്രയും പ്രശ്നങ്ങളെ നിങ്ങളായിട്ട് വിളിച്ചുവരുത്തി സല്‍ക്കരിക്കുന്നതെന്ന് അദ്ദേഹം ചോദിക്കുന്നു. ബില്ലര്‍ നമ്ബര്‍ ഉപയോഗിച്ച്‌ ശല്യപ്പെടുത്തുമെന്നും, നമ്ബര്‍ വാങ്ങുന്നത് കമ്ബനിക്ക് പ്രമോഷണല്‍ മെസേജ് അയക്കാനാണെന്നും നമ്ബര്‍ ആവശ്യപ്പെടാന്‍ രാജ്യത്ത് ഒരു നിയമവും നിലവിലില്ലെന്നും അദ്ദേഹം പറഞ്ഞുവെക്കുന്നുണ്ട്.
മനോജ് രവീന്ദ്രന്‍ നിരക്ഷരന്റെ ഫെയ്സ്ബുക് പോസ്റ്റ് ഇങ്ങനെ
പരമാവധി 7 അല്ലെങ്കില്‍ 10 വര്‍ഷമല്ലേ ആയിക്കാണൂ, സൂപ്പര്‍മാര്‍ക്കറ്റുകളിലും കോര്‍പ്പറേറ്റ് കടകളിലും ചെന്ന് സാധനങ്ങള്‍ വാങ്ങുമ്ബോള്‍ അവര് നമ്മുടെ മൊബൈല്‍ നമ്ബര്‍ ചോദിക്കാന്‍ തുടങ്ങിയിട്ട് ?
തുടക്കം മുതല്‍ക്കേ ഫോണ്‍ നമ്ബര്‍ തരാന്‍ പറ്റില്ല എന്ന് പറയുന്ന കൂട്ടത്തിലായിരുന്നു ഞാന്‍. പലചരക്ക് വാങ്ങാനോ തുണിത്തരങ്ങള്‍ വാങ്ങാനോ ചെല്ലുമ്ബോള്‍ അവര് നമ്ബര്‍ ആവശ്യപ്പെട്ടാല്‍, മുന്‍പിലും പുറകിലും അടുത്ത ക്യൂവിലും നില്‍ക്കുന്നവര്‍ക്ക് എല്ലാവര്‍ക്കും കേള്‍ക്കാന്‍ പാകത്തിന് ഉച്ചത്തില്‍ നമ്ബര്‍ വിളിച്ചുപറയുന്നവരുടെ കൂട്ടത്തില്‍ സ്ത്രീകളേയും ധാരാളമായി കണ്ടിട്ടുണ്ട്. നിങ്ങള്‍ (സ്ത്രീകളോടാണ്) അക്കൂട്ടത്തില്‍ പെടുന്ന ഒരാളാണെങ്കില്‍ ഒരാവശ്യവുമില്ലാതെ ഒരപകടമോ സ്വര്യക്കേടോ വിളിച്ചുവരുത്തുകയാണ്. സൂക്ഷിക്കുക!! ആ പരിസരത്തു നിന്ന് നമ്ബര്‍ കേള്‍ക്കുന്ന ഒരാളോ ആ കടയില്‍ ബില്ലടിച്ച ആളോ നിങ്ങള്‍ക്കൊരു ശല്ല്യക്കാരനായി മാറാം. നിങ്ങളുടെ നമ്ബര്‍ ആ കടക്കാരന്‍ പ്രമോഷന്‍ മെസ്സേജുകള്‍ അയക്കാനായി ഉപയോഗിക്കുമെന്നത് മൂന്നരത്തരം.
അതിന് വേണ്ടിയാണ് അവരത് ചോദിക്കുന്നത് തന്നെ. അതുക്കും മേലുള്ള തൊന്തരവുകള്‍ എന്തിന് സഹിക്കണം?
നിങ്ങളുടെ ഫോണ്‍ അത്തരം പ്രമോഷണല്‍ മെസ്സേജുകളെക്കൊണ്ട് അല്ലാതെ തന്നെ പൊറുതിമുട്ടി ഇരിക്കുകയാവുമല്ലോ. (DND ചെയ്തിട്ട് ഒരു കാര്യവുമില്ല എന്നാണെന്റെ അനുഭവം) നിലവിലുള്ളത് കൂടാതെ, വര്‍ഷത്തില്‍ കുറഞ്ഞത് 10 മെസ്സേജ് വീതം ഓരോ പ്രാവശ്യവും നിങ്ങള്‍ നമ്ബര്‍ ഇക്കൂട്ടര്‍ക്ക് കൊടുക്കുമ്ബോള്‍ കൂടിക്കൊണ്ടിരിക്കും. ഇതിനൊക്കെ പുറമേ ഇക്കൂട്ടര്‍ പലപല ടെലിമാര്‍ക്കറ്റിങ്ങ് ടീമുകള്‍ക്ക് നിങ്ങളുടെ നമ്ബര്‍ വിറ്റ് കാശുണ്ടാക്കുന്നുമുണ്ട്. ജീവിതത്തില്‍ മറ്റൊരു പ്രശ്നവും ഇല്ലാത്തവരായതുകൊണ്ടാണോ പുറത്തു നിന്ന് ഇത്രയും പ്രശ്നങ്ങളെ നിങ്ങളായിട്ട് വിളിച്ചുവരുത്തി സല്‍ക്കരിക്കുന്നത്? അങ്ങനെയാണെങ്കില്‍ കുഴപ്പമില്ല.
നമ്ബര്‍ കിട്ടേണ്ടത് അവരുടെ മാത്രം ആവശ്യമാണ്. നമ്മുടെ വിഷയമേയല്ല. താമസിക്കാന്‍ ഹോട്ടല്‍ മുറി എടുത്താല്‍ അഡ്രസ്സടക്കമുള്ള കാര്യങ്ങള്‍ പ്രൂഫടക്കം നല്‍കണമെന്നത് നിയമമാണ്. അല്ലെങ്കില്‍ മുറികിട്ടില്ല. പലചരക്കും തുണിത്തരങ്ങളും മറ്റും വാങ്ങാന്‍ നമ്ബറോ അഡ്രസ്സോ നല്‍കണമെന്ന് ഒരു നിയമവും ഈ രാജ്യത്തില്ല.
ആയതിനാല്‍ ഏത് കടക്കാരന്‍ നമ്ബര്‍ ചോദിച്ചാലും 'സോറി നമ്ബര്‍ തരാന്‍ പറ്റില്ല' എന്ന് അറുത്ത് മുറിച്ച്‌ പറഞ്ഞേക്കണം. അതുകാരണം അവര് സാധനങ്ങള്‍ തരുന്നില്ലെങ്കില്‍ ആ സാധനങ്ങള്‍ ആ കടയില്‍ നിന്ന് വേണ്ടെന്ന് വെക്കാനുള്ള ആര്‍ജ്ജവമുണ്ടാകണം. അതിന്റെ ഫലം അധികം വൈകാതെ നിങ്ങളാസ്വദിക്കാന്‍ തുടങ്ങും. തീര്‍ച്ച.
ഇത്രയും പറയാന്‍ കാരണം പലപ്പോഴായി ഈ പ്രശ്നം നേരിട്ടിട്ടുണ്ടെങ്കിലും ഇന്നത് മൂര്‍ദ്ധന്യത്തില്‍ എത്തിയതിനാലാണ്. More എന്ന് സൂപ്പര്‍മാര്‍ക്കറ്റില്‍ ആണ് ഏറ്റവും കൂടുതല്‍ ഈ തലവേദന എനിക്കുണ്ടായിട്ടുള്ളത്. പിന്നെപ്പിന്നെ അവരെ ഞാനങ്ങ് ഒഴിവാക്കാന്‍ തുടങ്ങി. യാതൊരു നിവൃത്തിയും ഇല്ലെങ്കില്‍ കയറും, എന്നാലും നമ്ബര്‍ കൊടുക്കില്ല. നമ്ബര്‍ ഇല്ലെങ്കിലും അവര് അഡ്ജസ്റ്റ് ചെയ്യാറുണ്ട്.
ഇന്ന് രാവിലെ ഒരു യാത്ര പുറപ്പെട്ട് വൈകീട്ട് ബാംഗ്ലൂരില്‍ നിന്ന് 150 കിലോമീറ്റര്‍ മാറി കര്‍ണ്ണാടകയിലെ മറ്റൊരു പട്ടണത്തിലാണ് ചേക്കേറിയിരിക്കുന്നത്. അത്താഴം കഴിച്ച്‌ നഗരത്തിന്റെ തിരക്കുകളിലൂടെയും കാഴ്ച്ചകളിലൂടെയും ഊളിയിട്ടപ്പോള്‍ Max ഷോറൂം കണ്ടു. കുറച്ച്‌ ദിവസമായി വാങ്ങണമെന്ന് കരുതിയിരുന്ന ഒന്നുരണ്ട് ഐറ്റംസ് അവിടുണ്ടെന്ന് ഉറപ്പുള്ളതുകൊണ്ട് അങ്ങോട്ട് കയറി.
ബില്ലിങ്ങ് തുടങ്ങിയപ്പോള്‍ അവര് നമ്ബര്‍ ചോദിച്ചു. സ്വിച്ചിട്ടത് പോലെ, നമ്ബര്‍ തരില്ലെന്ന് പറഞ്ഞു. ഞാനെന്റെ ഫോണില്‍ കുത്തിക്കൊണ്ടിരിക്കുകയാണ്. കൗണ്ടറില്‍ അനക്കമൊന്നും ഇല്ലെന്ന് മനസ്സിലായത് തലപൊക്കി നോക്കിയപ്പോള്‍ മാത്രമാണ്. 'ഫോണ്‍ നമ്ബര്‍ അടിച്ച്‌ കേറ്റാതെ സിസ്റ്റം മുന്നോട്ട് നീങ്ങില്ല സാര്‍' എന്ന് കൗണ്ടറിലെ പയ്യന്‍സ്. 'താങ്കളുടെ നമ്ബര്‍ അടിച്ച്‌ കേറ്റി സിസ്റ്റം മുന്നോട്ട് നീക്കിക്കോളൂ' എന്ന് ഞാനും. അയാള്‍ അപ്പോഴേക്കും അടുത്ത കൗണ്ടറിലെ പയ്യനുമായി ചര്‍ച്ച തുടങ്ങി. രണ്ടാളും ഒരേ സ്വരത്തില്‍ നമ്ബറിന് വേണ്ടി കടുംപിടുത്തം. മേല്‍പ്പറഞ്ഞ കാര്യങ്ങളൊക്കെ ചെറിയ തോതില്‍ ഞാന്‍ വിശദീകരിച്ചിട്ടും ചെറുക്കന്മാര്‍ വഴങ്ങുന്നില്ല. എന്നാല്‍ ശരി, 'ഈ കച്ചോടത്തില്‍ നിന്ന് മിഡില്‍ സ്ക്കൂട്ട് ചെയ്യുന്നു' എന്ന് പറഞ്ഞ് ഞാനിറങ്ങി നടന്നു. എനിക്ക് ₹2600 ലാഭം ഇവനേത് നാട്ടുകാനാണ് ഊവ്വേ എന്നമട്ടില്‍ തൊട്ടടുത്ത ക്യൂവില്‍ നിന്നവരൊക്കെ എന്നെ നോക്കുന്നുണ്ട്. ഇങ്ങനെയൊരു സംഭവം ഉണ്ടല്ലേ എന്നമട്ടില്‍ മാതാപിതാക്കള്‍ക്ക് ഒപ്പം നിന്നിരുന്ന ചില കൗമാരക്കാര്‍ അത്ഭുതം കൂറിയതാണ് ഇതിലെ പ്ലസ് പോയന്റ്. കാര്‍ന്നോമ്മാര്‍ക്ക് പുച്ഛമായിരുന്നെങ്കിലും പിള്ളേരത് ശരിയായ രീതിയില്‍ ഏറ്റെടുത്തോളും. അവര് പൊളിക്കും.
കൊടുക്കാതിരുന്നിട്ടും നമ്മുടെ നമ്ബര്‍ പല കച്ചവടക്കാരുടേയും ബാങ്കുകളുടേയും പക്കലുണ്ട്. ക്രെഡിറ്റ് കാര്‍ഡ് വേണോ എന്ന് ചോദിച്ച്‌ രണ്ട് വിളികളാണ് ഇന്നലെ മാത്രം HDFC ബാങ്കില്‍ നിന്ന് വന്നത്. എന്റെ നമ്ബര്‍ നിങ്ങള്‍ക്കെവിടന്ന് കിട്ടി എന്ന് ചോദിച്ചാല്‍, അത് ഞങ്ങളുടെ ഓഫീസ് ഡാറ്റാബേസിലുണ്ട് എന്ന് അഭിമാനത്തോടെയും ഗര്‍വ്വോടെയുമായിരുന്നു ആദ്യകാലങ്ങളില്‍ കോള്‍സെന്റര്‍ പിള്ളേരുടെ മറുപടി. ഈയിടെയായി ആ സമീപനത്തിന് ഇടിവ് വന്നിട്ടുണ്ട്. പലരുടെ അടുത്തുനിന്ന് ചീത്ത കേട്ട് കേട്ട് പതം വന്നു കാണും. മേലാല്‍ എന്നെ വിളിച്ചാല്‍ എന്റെ ഫോണ്‍ നമ്ബര്‍ ദുരുപയോഗം ചെയ്യുന്നതിന് കോടതി കയറ്റും എന്ന് പറയലും മറുവശത്തു നിന്ന് പീ... പീ... പീ.
ഇനി നിങ്ങള്‍ക്ക് തീരുമാനിക്കാം ഏത് മാര്‍ഗമുപയോഗിച്ച്‌ ഇക്കൂട്ടരെ അകറ്റി നിര്‍ത്താമെന്ന്. എനിക്കറിയുന്ന വിദ്യകളൊക്കെ വിശദമാക്കി കഴിഞ്ഞു. മറ്റേതെങ്കിലും വിദ്യകള്‍ കൈവശമുണ്ടെങ്കില്‍ എന്നോട് പങ്കുവെക്കുകയുമാവാം. ഇങ്ങനെ എല്ലാവരും നോ പറഞ്ഞ് പറഞ്ഞ് ഇവന്മാരുടെ ഡാറ്റാബേസ് ചൊക്കിലടിച്ച്‌ ചാകുന്ന കിനാശ്ശേരിയാണ് ഞാന്‍ കാണുന്ന സ്വപ്നം.
വാല്‍ക്കഷണം:- മോണോപ്പോളി കച്ചവടക്കാരുടെ അടുത്ത് ഈ നമ്ബര്‍ വിലപ്പോകില്ല. ഉദാഹരണത്തിന് KSEB (ഉദാ മാത്രമാണ്. അതില്‍പ്പിടിച്ച്‌ തൂങ്ങണ്ട) അങ്ങനെയുള്ളവര്‍ക്ക് വഴങ്ങിയേ പറ്റൂ. കൗപീനവും മേല്‍മുണ്ടും സാമ്ബാറിനുള്ള കഷണവുമൊക്കെ ഒരിടത്ത് ബഹിഷ്ക്കരിച്ചാലും വേറെ പത്തിടത് കിട്ടും.
Post a Comment